Monumentu al Mineru

Arte y cultura

Monumentu al Mineru

La Coḷḷadieḷḷa, Mieres

Inauguróse de manera oficial el 11 de xunetu del 1972 nel altu de La Coḷḷadieḷḷa, en plenu Paisaxe Protexíu de les Cuenques Mineres, a 820 metros d’altor y con vistes espectaculares sobre los conceyos de Mieres, Llaviana, Samartín del Rei Aurelio, Ayer y Ḷḷena. Esi allugamientu privilexáu paecía’l sitiu afayadizu pa llevantar un monumentu en memoria de los mineros de les cuenques d’El Caudal y d’El Nalón

Desiderio Fernández Suárez, un maestru turonés, foi’l promotor d’esi proyeutu, como tamién de la mina imaxe asitiada na mesma llomba y onde se recreaba l’interior d’una galería minera. El diseñu del monumentu basóse nun dibuxu orixinal de Sabino Fernández Antuña, Sabi del Viso, nel qu’apaecen dos mineros auníos llevando los preseos que meyor los representen: la llámpara, l’hachu y el martiellu. Les figures, que con dicha xuntura simbolicen la solidaridá propia de los mineros, llevántense sobre una base de mampostería. El conxuntu escultóricu arródiase de cuadros metálicos de mina. L’artesanu del metal de Turón, Diego Dorado, encargóse d’executar la obra. 

Mónica García Cuetos

GALERÍA D'IMAXES