Rampa-Minero

Arte y cultura

Rampa Minero (Miguel Ángel Lombardía)

Plaza de la Paz, Mieres

Nun actu cargáu de simbolismu, el 4 d’avientu del 1996, festividá de Santa Bárbola, inaugurábase Rampa-Minero, el colosu llevantáu por Miguel Ángel Lombardía na Plaza la Paz de Mieres.

La monumental escultura costióse per aciu de soscripción popular, siguiendo’l camín de los monumentos conmemorativos tradicionalmente dedicaos a les grandes figures de la industrialización. Sicasí, nesti casu, nun se trataba d’homenaxar al buen patrón, cuidadosu vixilante del rebañu y de la so facienda. Na poderosa figura de Lombardía, por contra, la reconocencia y l’emponderamientu dirixíense a la fuercia del trabayu, a los homes y a les muyeres de la mina y, en particular, a los catorce finaos el 31 d’agostu del 1995 na traxedia del Pozu San Nicolás, la última de les esplotaciones mineres que caltién güei la so actividá.

Un imponente bustu executáu en bronce, de marcáu puxu espresivu y quitu de tou componente aneudóticu, acueye nes sos coraes una rampla de mina. Una escultura rotunda, anclada na tierra onde’l tradicional pedestal se reemplaza por un reducíu soporte d’aceru corten y una zapata de formigón. La llama prendida que, n’orixe, abellugaba nel so interior debía simbólicamente tener la preservación de la memoria.

Rampa-Minero ha contemplase nel marcu de la fértil trayeutoria creativa del llangreanu Miguel Ángel Lombardía, un artista que, conxugando procedimientos, recursos y llinguaxes plurales –pintura, dibuxu, escultura, ilustración, obra gráfica– trazó renovaos rumbos que dende’l realismu social lu llevaron al neoespresionismu, pasando pela nueva figuración. Una obra densa y meditada que, con un claru sentíu identitariu, dio entrada al mundu de la mina conciliando compromisu social, espresivismu, simbolismu y reafirmación matérica.

Les carteles qu’incorpora’l monumentu recueyen dos dedicatories: “A los mineros de tol mundu finaos n’accidente de trabayu. Mieres 31 d’agostu del 1995 (A los mineros de todo el mundo muertos en accidente de trabajo. Mieres 31 de agosto de 1995)” y “Inauguróse esti monumentu fechu per aciu de soscripción popular, el día 4 de payares del 1996, festividá de Santa Bárbola patrona de los mineros (Se inauguró este monumento realizado mediante suscripción popular, el día 4 de noviembre de 1996, festividad de Santa Bárbara patrona de los mineros)”.

Natalia Tielve García

 

GALERÍA D'IMAXES