Industries
La nave de Fornos de Fuexa, asitiada perpendicularmente a les de Llaminación na zona más oriental de la planta siderúrxica nel conceyu d’Avilés, ye una construcción con autoría atribuyible a la planificación del inxenieru Carlos Fernández Casado y a la collaboración del xefe d’Obres Civiles de la empresa, Amalio Hidalgo, yá entrada la década de los cincuenta.
Esti inmueble imponente de formigón cubre una superficie total de 5.500 metros cuadraos, y tien unes dimensiones de ciento setenta metros de llonxitú, trenta d’altor y trenta de lluz, resueltos con cerches d’aceru na cubierta. La gran nave de formigón cuenta con vanos en tol so perímetru, lo que favorez la entrada de lluz natural al espaciu de trabayu. Amás, nel so costáu oeste llevantáronse diez chimenees de lladriyu y, en cada testeru del espaciu, púnxose un mural musivariu compuestu por formes xeométriques cuadrangulares de colores diferentes d’inspiración neoplasticista.
Al edificiu llegaba per ferrocarril un tren procedente de Fornos d’Aceru. Tres el so accesu al interior dende’l norte, dos grúes encargábanse de retirar la lingotera pa estrayer el lingote con dos pontes-grúa y proceder a dexalo nel interior d’ún de los venti fornos Pitt distribuyíos na nave. Esti pasu permitía recalentar l’aceru pa qu’algamase una temperatura óptima enantes de pasar al tren llaminador de les naves de Llaminación. Pa ello emplegábase como combustible el gas procedente de les Bateríes de Fornos de Coque y de los Fornos Altos.
Tres el so cese productivu na década de los años ochenta, la construcción firme entamó un procesu d’abandonu y desigua que concluyó nel añu 2017, momentu nel que les sos instalaciones reconvertiéronse en taller de calderería pal Grupo Daniel Alonso. La so rehabilitación requirió l’adaptación de les víes d’accesu antigües a les necesidaes nueves, anque en tou momentu respetóse la morfoloxía orixinal del edificiu y los sos valores.
GALERÍA D'IMAXES
Comentaris recents