Parque Dolores Fdz. Duro

El parque lleva’l nome de Dolores Fernández Duro, Marquesa de La Felguera y nieta de Pedro Duro Benito, fundador de la sociedad Duro y Cía. A él dedícase’l monumentu conmemorativu que preside’l recintu. Fechu pol escultor catalán Jerónimo Suñol, nel 1895, taba nel so orixe nel interior de la planta metalúrxica. L’efixáu, en bronce y de cuerpu enteru, álzase, conforme a la tradición decimonónica, sobre un pedestal de mármol nel que se recueyen motivos diversos alusivos a la industria siderúrxica, encabezaos por una chimenea y ruedes dentaes. Na placa qu’incorpora nún de los sos frentes diz elocuentemente: “Este monumento perpetuará para sus días, en recuerdo y honor, a quien supo, con su honradez intachable y su gran inteligencia, dar gloria a La Felguera, a Asturias y a España (Esti monumentu perpetuará pa los sos díes, en recuerdu y honor, a quien supo, cola so honradez impecable y la so gran intelixencia, dar gloria a La Felguera, a Asturies y a España)”.

Polo qu’al trazáu se refier, el parque presenta una planta irregular, allargada, y bórdialu un paséu perimetral. Internamente apaez organizáu en retícules al traviés de parterres y, en sentíu llonxitudinal, crúcialu una cai. Asítiense nél diferentes pieces de mobiliariu, ente les que resulten particularmente reseñables les cinco faroles de fierro fundío asitiaes na zona central, fabricaes na planta de La Felguera. 

Nesti espaciu central ta otru elementu singular, el quioscu de la música, construyíu na tercer década del sieglu XX. El quioscu, de planta poligonal, llevantáu sobre cimientu de piedra, amuesa columnes de fundición que tienen pola cubierta cupulada, montada sobre una estructura de madera y rematada con llinterna recubierta con escames de cinc. 

Natalia Tielve García