Industries
La necesidá de contar con un espaciu afayadizu pa la venta d’alimentos frescos y evitar los inconvenientes de la celebración del mercáu de ganáu en plena vía pública dexábase sentir cada vez con más fuerza en Ribaseya a midida que la villa crecía col impulsu de l’actividá intensa del so puertu y l’aumentu de la población. Esta medría notábase sobre manera nel branu cola llegada de la seleuta colonia de braniantes con vezos de consumu propios de les modernes concentraciones urbanes.
El proyeutu redautólu nel 1935 Manuel García Rodríguez (Xixón, 1898-1980), arquiteutu municipal de Ribeseya dende’l 1932 a 1964. García plantega un edificiu con una función doble: mercáu d’abastos y mercáu de ganáu. Finalmente esta función última eliminóse del proyeutu.
L’espaciu interior del mercáu, destináu tou a ventes, distribuyíase en puestos de dos clases: zarraos periféricos y abiertos o centrales. Tamién s’habilitaron puestos esteriores na terraza cubierta en voladizu qu’arrodiaba al edificiu per dos de los sos frentes.
El sistema xeneral de construcción tuvo como material principal el formigón armao, lo que fixo posible una cimentación óptima nel difícil suelu nel que s’asitia l’edificiu, un terrén ganáu a la ría. L’usu d’esti material esplicaría la participación nel proyeutu de Ramón Argüelles Álvarez del Busto, inxenieru de la Junta de Obras del Puerto de Gijón. Esta collaboración amuesa l’empeñu de los arquiteutos racionalistes en dar protagonismu a la estructura como parte esencial de la obra arquiteutónica. Amás, esta collaboración dará l’impulsu definitivu a la construcción con formigón armao tres una primer etapa d’introducción na que serán los inxenieros los primeros n’utilizalo, razón pola que les primeres aplicaciones se producen nel ámbitu de la inxeniería, la industria y la obra pública.
Magar les modificaciones, amestadures, alteraciones y cambeos d’usu pelos que pasó’l mercáu de Ribeseya, entovía conserva los sos valores orixinales, como l’harmonía de les sos proporciones, la lluminosidá que da la so equilibrada distribución de vanos y el so papel como representante dignu d’un estilu arquiteutónicu que frayó cola tradición.
GALERÍA D'IMAXES
Comentaris recents