Parque Dorado

Na década del 1860 construyóse la carretera d’Uviéu, pero un brazu secundariu del Nalón amenazaba la vía con cada crecida del calce. Será a partir del 1896 cuando s’entame la canalización del ríu, que fadrá posible incorporar a la función urbana los terrenos recuperaos ente’l calce fluvial y la carretera, y que vertebraríen el crecimientu de la villa per más d’un sieglu. Ente estos, nuna finca amplia de cuasi cuatro hectárees rellenada con estériles de les mines de Santana vería la lluz nel 1905 ún de los primeros parques públicos d’Asturies y, per bien de tiempu, el más estensu: el Parque Dorado.

A lo llargo del sieglu XX, el Parque Dorado tuvo incorporaciones y reformes que, sicasí, caltuvieron unes llinies xenerales que se conserven hasta anguaño. Foi la reforma de los años cincuenta la de mayor envergadura, cuando se sustituyó la gandinga –la ceniza colorao de diversos estériles industriales– por asfaltu, reordenóse’l paséu central quitando los bancos dobles y otros elementos degradaos, y va llevantase’l monumentu al trabayu nel so llateral menor meridional, elimináu llueu de manera parcial nos años ochenta. Y ye que, xunto a una variedá amplia d’especies vexetales onde primen les caducifolies como los pláganos, pero onde atopamos cedros, alcacies o sanxuaninos, son numberosos los elementos qu’atopamos nel parque y que daten de tol sieglu XX. Rescampla’l quioscu de la música, del 1906 y obra, como’l restu del trazáu del xardín, de Juan Manuel del Busto, entós arquiteutu municipal de Llangréu. Igualmente, ente los monumentos esistentes merecen mención dos, fechos dambos gracies a la soscripción popular: el monumentu al fundador, l’alcalde Dorado que da nome al parque, del 1906; y, sobre manera, el llevantáu a Luis Adaro y Magro nel 1918, obra de Lorenzo Collaut Valera, que consta d’un bustu del industrial asitiáu sobre un pedestal nel que s’asienta la figura alegórica de La Carbonera. 

Faustino Suárez Antuña