Mercáu d’Abastos

Col impulsu del consistoriu llangreanu del alcalde Celestino Cabeza a la cabeza, nel 1902 proyéutase un mercáu cubiertu que s’inaugurará cinco años depués. Asitiaráse próximu a la ilesia, a un centru escolar y a la Escuela d’Artes y Oficios, nuna finca nel parque vieyu de la población cedíu pola familia del fundador de la sociedá Duro y Cía, que nestos primeros años del sieglu XX tresformábase na Sociedad Metalúrgica Duro Felguera. L’edificiu combinaba una estructura interior de fierro con un zarramientu esterior de lladriyu macizo y piedra artificial. Especialmente llamativu resultaba’l remate n’arcu de ferradura rebaxáu de los vanos.

Namái diez años más tarde, l’ampliación del parque fai necesario’l treslláu del mercáu, amás de la ocupación de la güerta esplotada polos flaires de La Salle, responsables del centru escolar. El valtamientu entama nel 1918 y la población felguerina habrá d’esperar hasta’l 1922 p’asistir a la inauguración del mercáu nel so nuevu allugamientu, proyeutu del que se fixo cargu l’arquiteutu municipal José Ramón del Valle. Na década de los cincuenta será preciso ampliar l’espaciu disponible, lo qu’implicará la sustitución de la cubierta. L’arquiteutu Julio Galán, responsable nesos años de les obres municipales, será l’encargáu de les modificaciones. Ye pa rescamplar la solución adoptada pa la cubierta nueva, na que s’usa’l sistema de bóvedes allixeraes con pieces cerámiques desendolcáu pol inxenieru de Caminos, Ildefonso Sánchez del Río, que permitía salvar la lluz de 30 metros del edificiu, ensin encontos intermedios, con una bóveda de tan solo 18 cm d’espesor.

Una reforma nueva fecha nel añu 2006 modificará notablemente l’aspeutu d’esti edificiu, protagonista de les fondes tresformaciones d’una población que nació y creció al ritmu que marcaba una fábrica.

Mónica García Cuetos