Pobláu de La Camocha

Un primer grupu de venti cases unifamiliares apegaes, construyíes ente los años 1943 y 1946, formen el nucleu orixinariu del pobláu. Respuenden a una tipoloxía elemental d’agospiu organizáu en dos altures, con trés cuartos, cocina, comedor, bañu y finca na parte d’atrás. Con cubierta a doble vertiente, sobrios nel so tratamientu, llevántense en materiales modestos, con fachada sobre zócalu de piedra y murios de lladriyu.

Metanes la década del 1950, énte la insuficiente ufierta d’agospios pa un númberu creciente de trabayadores, constrúyense cien bloques de viviendes de lladriyu, de dos y trés pisos, con dos vecinos por planta. No qu’al programa se refier, respuenden a una división de cuartos asemeyada a les cases de la primer etapa constructiva. Llevántense amás dellos equipamientos, encabezaos poles escueles y siguíos pol mercáu; l’economatu; el Llar del Productor, con biblioteca y bolera; establecimientos comerciales y chigres. A lo último d’esta década, al amparu del Instituto Nacional de la Vivienda, entámase una promoción nueva, con 52 viviendes protexíes. Nesti casu los bloques, construyíos en formigón, con fachaes llaterales de lladriyu, organícense en dos pisos d’altura. Finalmente, l’ampliación postrera del pobláu, avanzaos los sesenta, vencéyase a la construcción d’un conxuntu de bloques de 4 plantes asitiaos en Vega de Baxo.

Xunto coles unidaes que componen el pobláu, la empresa promueve al pie de la esplotación un grupu de viviendes destinaes a los cuadros téunicos de Mina La Camocha. Conocíu como El Vaticano, configúrase como una colonia de 46 viviendes unifamiliares pa emplegaos y 4 xalés pa inxenieros. Los primeros, distribuyíos en dos plantes, cuenten con estragal, comedor, cocina, office, cuatro cuartos, bañu, llavabu y xardín; una filera de cobertizos sirve como cocheres. Los xalés pa inxenieros ufren una distribución asemeyada, pero tienen una finca de mayores dimensiones y garaxe propiu.

Natalia Tielve García