Poco enantes de la Guerra Civil Fábrica de Mieres anicia l’afondamientu del so primer gran pozu vertical d’estraición, el Barreo, que retrasará la so apertura a entamos de la década del 1940. El Pozu Barreo vien a siguir perbaxo de la cota del valle’l llabor nel xacimientu que la empresa desarrollaba per aciu de minería de monte cola Mina Mariana y que yá amosaba señales d’agotamientu.
El castillete de Barreo será ún de los exemplos últimos de castillete construyíu con celosía metálico roblonao, yá que que mui pocu tiempu depués la soldadura llétrica tomaría’l relevu na construcción d’esti tipu d’elementos. El castillete de Barreo, amás, tien la peculiaridá de que la torre s’asienta nuna cota superior que los tornapuntes, nuna plaza sobreelevada que coneutaba con Marianes y que permitía xestionar el parque de vagones baxo esta. La zona asitiada na cota inferior de los tornapuntes agospia otres construcciones: la casa de máquines, coneutada coles polees coplanaries del castillete al traviés de los cables d’estraición; la subestación llétrica; o la chimenea, siendo valtada la llampistería antigua. La chimenea ye ún de los elementos más identificables de Barreo, pero, sicasí, ye anterior a esti. Rellaciónase cola antigua central termollétrica llevantada nel 1916, que taba dotada de turboxeneradores pa, en casu necesariu, sirvir a les mines que Fábrica de Mieres tenía nel área.
El 22 d’avientu del 1991, les executives sindicales del SOMA y CC OO, encabezaes por José Ángel Fernández Villa y Antonio González Hevia, zárrense na cuarta planta del pozu nel marcu d’unes xornaes intenses de protesta obrera en defensa del subsector hulleru.
El pozu cesaría la so actividá nel 1995. Anguaño parte de los edificios reutilizáronse pa funciones d’investigación y alministración. Na actualidá parte de les sos instalaciones alluguen el mayor proyectu de desenvolvimientu geotérmico d'España, tresformando l'agua de la mina n'agua caliente y climatización. L'antigua plaza de la madera del Pozu Barreo acueye'l campus universitariu de Mieres.
Faustino Suárez Antuña
Comentaris recents