Fináu Aguado, los cotos pasen a manes del Duque de Riánsares, esposu de la reina María Cristina, vilba de Fernando VII, al que los sos intereses económicos nel qu’habría de ser el Ferrocarril de Langreo dexáben-y observar la llocalización ventayosa de los xacimientos de Carbayín.
Sicasí, la Revolución del 1854 y l’exiliu de la Reina Gobernadora emballó tan impropios negocios, y estos xacimientos adquierlos Numa Guilhou acabando llueu en Fábrica de Mieres. L’interés de Guilhou nestes mines tan alloñaes de Mieres venía del fechu de que les sos meyores comunicaciones diben facer posible qu’operare nel llucrativu negociu carboneru, pero faciéndolo amás al traviés del Ferrocarril de Langreo, del que yera l’aicionista principal daquella. Nel 1925 los cotos emancípense como Minas de Langreo y Siero que, sicasí, funcionó con un ciertu calter subsidiariu de la metalurxa mierense, que-y cediera la xestión y tenía como socios a Pedro Pidal o Manuel Loring, casaos con fíes de Guilhou.
L’inxenieru Joaquín Velasco, importante arrendatariu de mines, afondará’l primer pozu vertical, La Muerte, nel 1916-1917, abriéndose’l segundu, Santa Marta, sobre’l 1950. Del primer pozu consérvase una casa de máquines curiosa y entovía ye visible la chimenea de la primer máquina d’estraición. El segundu ye un exemplu escelente de l’arquiteutura y castilletes de Fábrica de Mieres, siendo evidentes les asemeyances col Pozu San Nicolás, en Mieres, afondáu nos mesmos años.
Nel 1969 Minas de Langreo y Siero intégrase n’HUNOSA coles sos dos unidaes n’activu, Pumarabule y San Enrique o Lláscares (Candín II), que la compañía pesllará nel 2005 y 2013, de manera respeutiva.
Faustino Suárez Antuña
Comentaris recents