Pozu San Fernando

La SIA concentrará la so actividá minera nel conceyu d’Ayer, compartiendo espaciu cola poderosa Sociedad Hullera Española del Marqués de Comillas. Les sos concesiones na zona repartiránse pel valle mediu d’El Río Ayer y el d’El Río Nigru, organizaes en dellos grupos como Santa Bárbara, Santa Ana o Campueta. En L’Oyanco asitiaráse’l centru loxísticu de la empresa, con instalaciones como llavaderos y cargaderos. Al serviciu de los grupos, asegurando la comunicación ente ellos y la salida del carbón, la empresa diseñó una completa rede ferroviaria qu’incluyía un tranvía de vapor que descendía pela carretera hasta Uxo-Taruelo, pa enllazar col Ferrocarril Vasco Asturiano y la estación del Norte de Santuyano. 

Na década del 1950, énte l’agotamientu de los grupos de monte, la SIA afonda cerca d’Uriés el Pozu San Fernando. Ye un pozu balanza con un sistema d’evacuación del carbón distintu a los pozos verticales convencionales, que foi necesario adoptar por mor de la so llocalización a media lladera. La salida del mineral nun se facía pel embarque del castillete, sinón al traviés del Socavón Santa Ana de 1.850 metros de llargor asitiáu nel fondu del valle. Per esi socavón tamién entraben los mineros, tomando la xaula nel interior y ascendiendo con ella hasta caúna de les cuatro plantes, siendo efeutuada la tracción por contrapesos, de tal manera que’l carbón siguía una trayeutoria inversa al descender pela xaula hasta la primer planta, onde taba’l socavón.

L’actividad minera de la SIA cesó tres la so incorporación a la empresa estatal HUNOSA nel 1967.

De les instalaciones del Pozu San Fernando consérvense, nun entornu de gran guapura, el castillete d’aceru roblonao y 15 m d’altor, l’edificiu de la casa de máquines y el Socavón Santa Ana.

Mónica García Cuetos