Sanatoriu Adaro

Minería

Sanatoriu Adaro

Sama, Llangréu

Con más de cien años d’historia, el Sanatoriu Adaro promoviólu la Sociedad Metalúrgica Duro Felguera, la firma minero-metalúrxica más relevante d’Asturies y una de les que mayor notoriedá algamó nel conxuntu del país.

La empresa desendolcó una política paternalista que, más allá de les actuaciones entamaes en materia de vivienda, incluyó una rede d’economatos, centros educativos y servicios sanitarios. Nesti marcu asítase la construcción en Sama del Hospital de Heridos que, inauguráu nel añu 1914, convertíase en Sanatoriu Adaro nel 1940 recibiendo’l nome del so benefactor principal, l’inxenieru Luis Adaro y Magro.

L’Hospital de Heridos contaba de primeres con un únicu pabellón, de planta rectangular y llevantáu a una sola altura. L'inmueble esperimentó un crecimientu gradual, con ampliaciones y recrecíos socesivos a midida que la demanda d’asistencia a los trabayadores accidentaos se vio incrementada; en particular cola constitución del Patronato para Mineros Heridos de Langreo, nel 1930, del que la institución pasó a depender. Asina, al edificiu orixinariu sumáronse pabellones nuevos –Covadonga, Santa Bárbara, San Antonio y Nuestra Señora del Rosario– coles sos dotaciones correspondientes.

Adoptando una planta en forma de peine, el complexu queda integráu por cinco pabellones independientes axuntaos per una galería. Orientada hacia'l ríu Nalón, la galería funciona como fachada trasera; ábrense nella amplios ventanales cuadraos, enmarcaos por pilastres que combinen remates curvos y rectos. Los pabellones presenten idéntica llonxitú pero diferente organización n'altura: la mayor elevación correspuende al inmueble central, disminuyendo de manera progresiva hacia los estremos. El pabellón central reformóse na década del 1950 siguiendo'l proyeutu de Julio Galán Gómez, Arquiteutu Municipal de Llangréu, viendo reconfigurada la so organización interna. Al mesmu arquiteutu débense otres obres d'ampliación y d'ameyoramientu del conxuntu de les instalaciones entamaes nos años centrales del sieglu pasáu. Anguaño, la so xestión correspuende a la Sociedad Benéfico-asistencial Fundación Adaro.

Natalia Tielve García

 

GALERÍA D'IMAXES