Economatu de la SHT

Al tiempu que se faen estos trabayos, rellacionaos de manera direuta cola futura esplotación, entámase una intensa actividá constructiva de calter residencial y asistencial, en dalgunos casos n’espacios cercanos a lo que será’l Pozu Santa Bárbara.

L’inxenieru direutor de la sociedá, Francisco Fontanals, solicita nel 1917 llicencia municipal pa la construcción d’un edificiu nes cercaníes del pozu. El pisu superior destinaráse a residencia d’inxenieros solteros y na planta baxa abriráse un economatu pa l’atención de los trabayadores del nuevu centru de trabayu.

L’edificiu, ensin usu dende hai años, tiense en pie, anque nun estáu de conservación mui deficiente. Na so fachada principal entá pue lleese en grandes lletres la pallabra ‘ECONOMATO’.

Mónica García Cuetos