Sovacones Isabel y Emilia

Una bocamina ye la boca al esterior de la galería que sirve d’entrada y salida a una mina, de forma habitual al traviés d’un túnel horizontal, pero tambén per aciu un pozu- planu. Cuando esta entrada conforma’l nivel basal d’una esplotación de monte compuesta de dellos pisos en lladera, pue nomase socavón. Esta entrada  presenta cuasi siempre un llau de debilidá énte los argayos, de mou que les esplotaciones mineres de cierta entidá solíen reforciar estes entraes con una portada con materiales que dirán evolucionando col tiempu dende les llábanes irregulares hasta’l sillar, el lladriyu o la piedra artificial. Dende bien aína les empreses grandes vieron nes bocamines una forma de dexar la so buelga y estilu.

L’interés de les empreses mineres qu’operaron nel valle del ríu Samuño por reforciar y distinguir les entraes a les galeríes, les bocamines y socavones, foi mui llimitáu, magar los casos del Isabel y el Emilia, de Carbones de La Nueva, o, tamién, la bocamina Trechora abierta por Carbones de Santa Ana y reformada pola Duro, suponen exemplos d’altísimu interés. 

Nel casu del socavón Isabel, ésti organizaba les mines de monte de Carbones de La Nueva enantes de que la empresa, recién adquirida pola Real Compañía Asturiana de Minas p’abastecer d’hulla les instalaciones del grupu tres el pieslle de la Mina d’Arnáu, decidiera beneficiar el xacimientu perbaxo del nivel del valle, per aciu d’un pozu vertical: el San Luis. El sillar de piedra y el lladriyu son los materiales utilizaos nel socavón Isabel, onde l’arcu escarzanu que constitúi la entrada ta acabáu nun remate mistilliniu distintivu en frontón, añadíu llueu a la fecha del 1904 que se ve na clave.

Respeuto al socavón Emilia, nacíu nel marcu de la minería de monte y na mesma fecha que l’anterior, siguió cumpliendo un papel importante cola entrada en funcionamientu del pozu vertical, dao que la so galería enllazó cola primer planta del pozu y per ella salía al esterior la producción del San Luis hacia’l llavaderu. Sicasí, dende’l 1923, sólo vemos la parte inferior del mesmo pol fechu de que la construcción d’una carretera demochó la interesantísima parte superior. Caltiénse, por contra, l’arcu escarzanu, el nome de la empresa llabráu y los materiales orixinales, sillar de piedra y lladriyu col que se llevantó.

Faustino Suárez Antuña