Entetexendo producciones: les otres industries asturianes

A lo llargo de más de dos sieglos el territoriu asturianu convirtióse n’encontu pal desendolcu d’industries diverses nel so llabor productivu, tipoloxía estructural o nel so asitiamientu. Esti texíu industrial heteroxéneo viose reforzao pol aprovechamientu de les condiciones orográfiques ya hidrográfiques, el desendolcu de los medios de tresporte o’l fenómenu de la emigración, que determinaron la conformación del diversu paisaxe industrial asturianu.

Dende finales del sieglu XVIII, la bayura de tipoloxíes na industria asturiana produxo dalgunos casos singulares de patrimoniu industrial. Nesti sen, hai que solliñar la fábrica de tabacos xixonesa de mediaos del sieglu XIX que, xunto a la Fábrica d’Armes de La Vega, constituyeron dos exemplos asturianos destacables na reutilización industrial de conxuntos conventuales desamortizaos, práutica relevante na implantación fabril que se daría en bien de llugares españoles.

Nel sector agroalimentariu, non solo tendría especial relevancia la tabacalera xixonesa nel emplegu de mano d’obra femenino, sinón que sedría una carauterística compartida cola importante industria conservera que s’asentaría nos principales puertos pesqueros. A estes activides axuntóse la ellaboración de bebíes alcohóliques como cerveza y, más específicamente, la producción de sidra axampanao, a la que contribuyiría’l fenómenu de la emigración pa la so popularización.

La producción d’oxetos pa diario o de materiales constructivos arraigonó n’enclaves d’ellaboración de vieyo, como la producción de lloza en San Cloyo o la de vidru n’Avilés. D’igual miente, l’esplendor del desarrollu portuariu pal tresporte de los productos, reflexóse tamién na construcción naval, primero na tradición de carpintería de ribera, y nel s. XX, nel puxu de los astilleros. Col pieslle de Naval Xixón en 2009 acabó un ciclu que perdura na memoria de la llucha obrera y sindical y nel arte urbanu del entornu circundante.