Fábrica Águila Negra

Les sos instalaciones constitúin ún de los exemplos más interesantes de l’arquiteutura industrial asturiana rellacionada cola producción alimentaria. Llueu de sobrevivir a la Guerra Civil y algamar nes décades centrales del sieglu un periodu d’esplendor, con una producción de 48.000 litros de cerveza diarios, la empresa entamó un procesu de declive que la llevó al pieslle yá iniciada la década de los noventa.

L’edificiu principal ye’l de mayores dimensiones del conxuntu y rescampla pola so monumentalidá. Tien dos alturas sobre rasante y trés cuerpos articulaos per aciu de ventanes con arcos carpanel, con cuatro torres alredor. Na parte central asítiense dos, onde predomina’l lladriyu visto, con una cubierta plana arrodiada por almenes del mesmu material y abiertes, al frente, por grandes arcos de mediu puntu. Les otres dos torres, colocaes nos estremos, incorporen nel frente los vanos de la mesma morfoloxía pero les sos cubiertes a cuatro agües con gran inclinación empleguen el cinc como material principal. Les chimenees que tán nestos dos cuerpos incorporen como elementu ornamental formes inspiraes n’ales d’ave, acordies al nome de la empresa.

Na parte posterior atopamos la chimenea de lladriyu, qu’inclúi col mesmu material una referencia al añu d’inauguración de la fábrica. Esta construcción llevántase sobre una base de planta cuadrangular d’altura considerable, y remátase por una cenefa d’aniellos concéntricos y faxes asitiaes na parte superior.

La planta productiva propiamente dicha valtóse tres el pieslle de la fábrica por vese sumida nun gran abandonu paralizáu nel añu 2018 con una sentencia xudicial que condenó a la propiedá por delitos contra’l Patrimoniu Cultural y, en consecuencia, a rehabilitar los restos conservaos ensin qu’entovía se decidiera’l so usu futuru. 

Rubén Domínguez Rodríguez