UNINSA

La empresa surdía del acuerdu de collaboración ente les tres grandes firmes de la siderurxa histórica asturiana: la Sociedad Metalúrgica Duro Felguera, la Fábrica de Fundición de Mieres y la Sociedad Moreda-Gijón. L’alcuerdu daba pasu, el 1 d’agostu del 1966, a la decisión de fusionase aportando los activos; sumaríensen llueu’l Ministeriu d’Industria, a través del INI, la firma alemana Krupp y aicionistas privaos. 

La planta siderúrxica de Veriña, inaugurada’l 6 de setiembre del añu 1971, construyóse siguiendo’l modelu proporcionáu pola alemana Krupp, dando respuesta a los nuevos avances teunolóxicos y produciendo aceru mediante’l procesu LD. Na so planificación tendríase especial atención nel asitiamentu de les instalaciones d’almacenamientu y preparación de los minerales, cola fin d’aprovechar les ventayes de llocalización: los graneles, descargaos nel Dique Norte d’El Musel, tresportaríense al traviés d’una cinta doble que, travesando’l túnel de La Campa de Torres, permitía depositalos nos parques d’Aboño. 

El nucleu principal de la cabecera quedaría integráu polos dos fornos altos, les dos plantas de sinterización, l’acería de conversión por oxíxenu LD, los trenes de llaminación en caliente y l’embalse de San Andrés. Siguiendo’l procesu productivu, la fabricación orientaríase hacia dos tipos de productos acabaos, llargos y planos, xunto colos productos finales.

En setiembre del 1973, nel marcu de la política de concentración d’empreses que’l Ministeriu d’Industria venía impulsando, UNINSA foi absorbida pola Empresa Nacional Siderúrgica, S. A., ENSIDESA. Tres travesar non poques dificultaes qu’amenazaron la so continuidá –integrándose nel 1994 na Corporación Siderúrgica Integral, CSI; nel 1997 n’Aceralia, más adelante n’Arcelor; y finalmente nel grupo ArcelorMittal– la planta de Veriña sigue entovía güei, por fortuna, produciendo aceru. 

Natalia Tielve García