Espaciu Fabril RCAM

Reduxo la xenerosa concesión a una zona, amplia, al rodiu d’Arnáu y El Puertu, y la empresa centróse na esplotación minera. Quiciabes sía, como se describió, el “frutu d’un mal cálculu”, yá que meyores xacimientos hulleros había nes cuenques d’El Nalón y El Caudal, pero nun ha escaecese que les cuenques nun teníen entovía comunicación cola mar y qu’ésta tardaría tovía en llegar: más d’una década pa la construcción de la Carretera Carbonera y dos pal Ferrocarril de Langreo. Asina, más que probablemente, la orixinaria RCAM nun tuvo más alternativa que la retirada a Arnáu y resistir.

Metanes el sieglu XIX, la cotización europea del zinc recupera y, amás, descúbrese’l xacimientu de calamina de Reocín en Cantabria. Éstes serán dos de les bases sobre les que l’inxenieru de la compañía Jules Hauzeur edificará una nueva RCAM. La metalurxa del zinc supón la culminación d’aquel proyeutu inicial, mentanto que la planta aprovechará’l carbón de la mina fabricando un productu d’altu valor añadíu y de gran espansión nel ciclu de crecimientu urbanu qu’esperimenta Europa y que s’utilizaría na construcción (cúpules y cubiertes, baxantes…), na industria naval, n’infinidá de bienes de consumu…

Hasta l’entamu del sieglu XX la planta metalúrxica d’Arnáu nun definió’l so aspeutu definitivu, pa lo qu’hebo espulsar les funciones residenciales qu’hasta entós s’amestaben coles fabriles. Naz entós la que, tres la mina y la fábrica, será la tercera de les pieces d’Arnáu, el pobláu. De forma paralela, la RCAM iniciará una nueva diversificación cola instalación d’una fábrica d’esplosivos en San Xuan, reconvertida llueu en planta de fertilizantes. Precisamente será en San Xuan onde a partir del 1957 una compañía nueva entamará la so andadura, Asturiana de Zinc, participada pola RCAM, a la qu’acabaría absorbiendo. 

Un accidentáu pero esitosu devenir pa una de les poques empreses asturianes qu’estiende la so actividá a lo llargo de trés centuries.

Faustino Suárez Antuña