Industries
372442404
Pozu Barredo
341653276
Les Pieces
372440376
Pozu Polio
373211437
Fábrica de Mieres
527432125
Llocomotora FM 102
375457502
Ponte de los Ingleses
372908346
UNINSA
L’orixe de la Fábrica de Mieres dátase nel añu 1842 cola constitución en Londres de la sociedá Asturian Coal and Iron Company, que pretendía esplotar mines de carbón y fierro y poner en marcha una fábrica de fierros en Mieres. Asocédela nel 1844 l’Asturian Mining Company o Compañía Anglo Asturiana, patrocinada pol industrial John Manby con participación d’inversores ingleses, franceses y españoles. Cuatro años más tarde entama a funcionar el primer fornu altu de la factoría instalada na población mierense d’Ablaña.
Les dificultaes plantegaes pola ausencia de víes de comunicación afayadices faen fracasar esta sociedá como también lo fadrá la so socesora, la Compagine Minière et Métallúrgique des Asturies. De les sos propiedaes faise cargu nel 1870 la Societé Hullière et Métallúrgique des Asturies col empresariu francés Numa Guilhou al frente. Nel 1879 pasa a llamase Sociedad Fábrica de Mieres.
La incorporación nel 1873 del inxenieru de mines Jerónimo Ibrán y l’apertura de les llinies de ferrocarril La Pola Ḷḷena-Xixón (1874) y Madrid-Xixón (1884) faciliten el despegue definitivu de la empresa.
Amás de la puesta en marcha de la factoría, Fábrica de Mieres desendolcó una intensa actividá minera na zona, con pozos como Barredo, Nicolasa y Polio, en Mieres, amás del grupu Cobertoria en Ḷḷena y otres mines repartíes pelos conceyos d’Uviéu, Llangréu, Siero, Llanera o Quirós.
Nel añu 1961 xunto con Fábrica de Moreda y Gijón y Duro Felguera ponen en marcha la Unión de Empresas Siderúrgicas Asturianas, S.A., UNINSA, col oxetivu d’esplotar un modernu tren de llaminación en Veriña (Xixón), que se completará cola construcción d’una factoría siderúrxica nesi mesmu llugar. Nel 1973 prodúzse l’absorción d’UNINSA por parte de la empresa estatal ENSIDESA y con ello iníciase’l pieslle de les instalaciones de la factoría mierense, entamando nel 1974 pola acería Martín-Siemens y acabando nel 1980 col tren de chapa. A los trabayadores treslladaránlos poco a poco a les fábriques de Xixón y Avilés.
GALERÍA D'IMAXES
Comentaris recents