Fornu Altu Carmen

El so prendíu tuvo llugar el 24 de setiembre del 1957, actuando como maestra de ceremonies la esposa del dictador Francisco Franco. La so función, intermedia dientro del procesu industrial, pasaba por producir l’arrabiu que posteriormente sería afináu nes aceríes d'ENSIDESA de cara a algamar aceru. Un añu depués, nel 1958, inauguróse’l fornu altu númberu 2 ‘Joaquina’, nel 1966 el númberu 3 ‘Rosario’ y nel 1969 el númbero 4 ‘IV Carmen’. Asitiábense toos ellos na parte posterior de les Bateríes de Fornos de Coque y Subproductos.

Na década de los años noventa los cuatro fornos esmanteláronse y la so icónica silueta borrada del horizonte avilesín, como síntoma de la evidente decadencia industrial que vivía la empresa. La última colada del fornu altu 1 aprovechóse, con un tratamientu cuasi escultóricu, pa una de les rotondes qu’articulen el nuevu polígonu.

Rubén Domínguez Rodríguez