Marqués de San Feliz

Col envís de facer frente a les necesidaes de vivienda, la Cooperativa de Maestros Armeros promovió la Colonia de San Feliz nel 1921. Construyida baxo la Llei de Cases Barates, ocupaba un solar de 3.500 metros cuadraos na redolada de la planta armera; los terrenos donólos el filántropu Antonio de Sarri y Oller, Marqués de San Feliz, del que la colonia recibe’l so nome.

Proyeutáu pol arquiteutu municipal Julio Galán Carvajal, el conxuntu residencial inauguróse de manera oficial nel añu 1924. Aplicóse na so planificación un módulu constructivu de costu asequible: la casa apareyada. D’esti mou, integraben la colonia ocho cases ximielgues que componíen un total de dieciséis viviendes. Asitiáronse siguiendo un trazáu ortogonal y contaben con un pequeñu xardín o güertu traseru pa la llabranza.

Caúna de les viviendes distribúise n’alzáu en suétanu, planta, pisu y desván. Apegaes per parede medianera, les cases quedes unificaes baxo trés cuerpos d’altura escalonada, onde se distingue un volume central con cubierta a doble vertiente y dos llaterales con cubrición a trés agües. No que respeuta al programa, na planta baxa asítiense la cocina, el comedor y la sala-despachu, mientres que’l pisu quedaba reserváu a cuatro cuartos y bañu.

N’años socesivos planificáronse otres promociones de vivienda destinaes a los operarios de la factoría: la Colonia La Nueva, nel 1926, con trenta cases apegaes; el Grupo del Brigadier Elorza, con 42 viviendes construyíes ente los años 1926 y 1929; y el Grupo Santa Bárbara, con un total de 160 viviendes.

Natalia Tielve García