Minería
A lo último del sieglu XIX dos fechos de diferente naturaleza serán cruciales pal desendolcu de la industria hullera na parte alta de la cuenca minera d’El Río Nalón. Per un llau, la prollongación del ferrocarril de Llangréu dende Sama hasta Llaviana nel 1888 qu’establecía la comunicación direuta y definitiva d’estos espacios col puertu de Xixón, dende onde s’unviaba’l carbón pal restu d’España. Per otru, el marcu de proteición creáu pol arancel Cánovas del 1891, que convertía la minería nun gran negociu.
Nesti contestu naz la empresa Coto Musel, desenvolviendo la esplotación d’unes mines con rexistros qu’empecipiaren na década del 1870. La sociedá queda integrada nel grupu industrial de José Martínez Rivas, ún de los miembros más activos y independientes de la oligarquía industrial vizcaína que, sobre les bases entamaes pol so tíu Francisco de las Rivas –primer marqués de La Mudela–, llevantara un emporiu formáu por mines, astilleros y una moderna siderurxa. La muerte de José Martínez nel 1913 supunxo la desapaición paulatina del grupu, cola venta de diferentes empreses a esceición de Coto Musel, arrendada nel 1926 a Joaquín Velasco, qu’afondara yá los pozos Pumarabule, Entregu o Sorriego.
Nel llugar d’El Meruxalín, en Llaviana, tenía la empresa Coto Musel cuarteles residenciales y el so focu mineru principal, rescamplando les bocamines Amada, La Mudela (pol marquesáu homónimu venceyáu a la familia) y San José. Dende equí, un ramal mineru treslladaba la producción hasta El Cantiquín, sobre Llaviana, faciendo descender el mineral hasta El Sutu, na vega, per aciu d’un impresionante planu inclináu. Ellí organizó la empresa’l tratamientu de los carbones y les oficines, unviando’l mineral per otru ramal hasta la estación del ferrocarril de Llangréu. Un sistema ferroviariu complexu que pasó a la cultura popular al través d’una famosa asturianada que diz: cuando la máquina pasa del Meruxal a Mardana va Manolín de Barredos cantando la Soberana.
Nel 1970 l’arrendatariu Joaquín Velasco faise cola propiedá de la mina, procediendo a la so venta y integración inmediata n’Hunosa, que la pieslla al añu siguiente por agotamientu de les reserves.
GALERÍA D'IMAXES
Comentaris recents