Industries
La fábrica de camises Confecciones Camino S.A. establezse n’Avilés, nel añu 1946, a pidimientu de Segundo Camino Piedra. Construyida siguiendo’l proyeutu fechu pol arquiteutu municipal Tomás Menéndez Abascal, la instalación constaba de dos naves de 10 x 40 metros, apegaes en sentíu llonxitudinal, una d’elles destinada a sala de máquines y la segunda, a almacenes. Completaba’l conxuntu un edificiu qu’acoyía oficines, cocines, comedor d’emplegaos, servicios sanitarios y vestuariu. Entrada la década del 1990 la producción traviesa una grave crisis a la que pon fin la clausura definitiva de l’actividá, el 28 d’avientu del 1995.
Tres unos años ensin usu, y una vegada adquiríes les instalaciones, el Conceyu d’Avilés plantega la so tresformación nun centru multidisciplinar dedicáu a les Industries Creatives, bautizáu como Factoría Cultural. Con esti fin l’Ayuntamientu encarga’l proyeutu d’acondicionamientu al arquiteutu municipal Aitor López Galilea. Desendolcada en trés fases, ente los años 2009 y 2012, l’actuación entamada llevó al valtamientu del edificiu d’oficines, reemplazáu por otru de nueva planta, de mou que namái se caltuvieron, modificaes notoriamente, les dos naves destinaes a almacén y abellugu de maquinaria.
La reconversión de la vieya factoría ha contemplase nel marcu d’una serie d’actuaciones feches n’Avilés nos años últimos. Ye’l casu de les entamaes nes antigües instalaciones de la Curtidora Avilés Industrial, la Fábrica de Harinas de Cereal El Águila, l’Astillero Fernández Hevia o la Pescadería Municipal que, mui desemeyaos ente sí no qu’a criterios d’intervención, rehabilitación y reconversión se refier, dieron llugar a equipamientos nuevos.
La Factoría Cultural concentra les sos actividaes na creación dixital y audiovisual, contando con espacios destinaos a talleres, sales d’usos múltiples, llocales d’ensayu y danza, biblioteca y otros servicios, dotaos con elementos de mobiliariu que na so mayor parte foron reciclaos, y qu’inclúin pieces de maquinaria industrial procedentes de la vieya fábrica de camises.
GALERÍA D'IMAXES
Comentaris recents