Les Fábriques d’Armes d’Asturies

La guerra de la Convención contra Francia, la presencia de mineral y la canalización del Nalón sedríen los tres factores determinantes pa que a lo cabero del sieglu XVIII s’instalare la Fábrica d’Armes de Trubia, amás de la d’Uviéu. El desastre del proyeutu d’El Nalón y la mala calidá del fierro llograo nos altos fornos fadríen que Trubia fore’l primer gran fracasu de la industrialización española que, sicasí, marcaría les pautes de la posterior industrialización basada nel carbón, la siderurxa y los tresportes. Dempués de décades de duldes, la llegada del brigadier Elorza a mediaos del s. XIX supondría’l rellanzamientu definitivu de la industria armamentística.

Nel casu de Trubia, cola so especialización n’armamentu pesao, significaría una medría con meyores tan importantes como la creación d’una Escuela d’Aprendices, la nacencia de diverses barriaes obreres o meyores téuniques na fabricación del aceru y les artes industriales, con momentos de puxanza cuando la Gran Guerra o’l periodu autárquicu, creando un verdaderu Paisaxe Industrial onde les comunicaciones ferroviaries sedríen esenciales. La fábrica d’Uviéu, pela so parte, destinada pa la fabricación d’armamentu llixero, cobraría la so verdadera importancia na segunda metá del s. XIX, cuando s’instala en La Vega, configurándose como’l principal focu industrial de la ciudá y motor del so espoxigue urbanu y demográficu; anguaño, l’antiguu espaciu productivu podría estremase en tres fases arquiteutóniques: les edificaciones anteriores a 1869, el periodu comprendíu ente 1917 y 1927 y el posterior a 1940.

La privatización d’estes industries nos empiezos del s. XXI supunxo’l pieslle de La Vega y la reestructuración de Trubia, dexando nel llimbu un Patrimoniu Industrial que, magar la so importancia y declaración como parte del Inventariu del Patrimoniu Cultural Asturianu dende setiembre de 2018 nel casu trubiecu, tien como tarxeta de visita l’abandonu, nun procesu d’enayenamientu del procomún tan abondoso na nuesa sociedá.