Tendrá una llocalización y un allugamientu de primer nivel na xerarquizada estructura espacial de la empresa metalúrxica: na pieza central del pobláu, mui cercanu a la vivienda del direutor y a la capiella, y na so fraición más elevada, nuna posición desfogada reforzada pola plataforma que lu sobrellevanta de la carretera y que lu abre al pequeñu valle onde se desendolquen les principales funciones industriales y residenciales de la compañía n’Asturies.
L’edificiu, que contaba con cuatro aules pa neños y neñes, presenta tres cuerpos auníos per un módulu central de doble altura, qu’organiza un ala a cada llau y una prollongación sobre la trasera que segmenta’l patiu de xuegos y estudios. Les escueles tán construyíes en lladriyu macizo visto formando distintos xuegos volumétricos nos recercaos de los vanos, dinteles y llinies d’imposta, rescamplando’l remate escalonáu del cuerpu central. Ye una obra realizada con un altu presupuestu, que contaba con unes instalaciones y equipamientos que fixeron que se consideraren les escueles meyor dotaes del so tiempu y onde destaquen los elementos asitiaos nel patiu: los magníficos mapas físicos, les formes xeométriques –que teníen el so correllatu en trés dimensiones feches con zinc nel interior–, relós pa deprender les hores o rayueles pal estudiu de la historia.
Les Escueles del Ave María confiáronse a maestros ‘manjonianos’ que punxeron en práutica’l so programa docente confesional dende una perspeutiva hixenista y eminentemente práutica qu’atopó n’Arnáu unes instalaciones escelentes pa desendolcase, rescamplando’l so yá mentáu patiu. N’efeutu, anque parte d’ésti utilizóse pa l’ampliación del colexu, ello nun limitó l’oxetivu verdaderu d’esti elementu: el so funcionamientu como aula principal, siguiendo’l modelu ideáu pol Padre Manjón y que constitúi ún de los más importantes testimonios materiales d’aquel enseñu pioneru.
Faustino Suárez Antuña
Comentaris recents