Espaciu de Residencia RCAM

La necesidá de proporcionar vivienda a un númberu creciente d’obreros inmigraos pronto se reveló como una política d’empresa afayadiza encaminada a promover la productividá del obreru per aciu’l fomentu d’una clase trabayadora a pie de fábrica, y, tamién, al control de la entrada de les corrientes reivindicatives de les restantes árees industriales d’Asturies por un aisllamientu natural prollongáu de manera intencionada a lo llargo del sieglu XX. 

Si nos primeros tiempos del espaciu fabril y mineru d’Arnáu la función residencial compartía suelu cola de producción, dende lo último del sieglu XIX entama a independizase hasta configurar el pobláu que güei conocemos. Podemos estremar trés grandes unidaes n’Arnáu: el pobláu propiamente dichu, l’espaciu de residencia central, domináu pola magnífica y anguaño estropiada residencia del direutor, nuna suave llomba qu’exerz de bisagra ente l’espaciu mineru y el metalúrxicu, y cases d’emplegaos y equipamientos como la esceicional escuela, que funcionaría baxo los presupuestos de la pedagoxía manjoniana. Sólo una pequeñísima promoción de vivienda obrera apaez nesti sector, ocupáu poles categoríes socio-profesionales más altes, con viviendes soleyeres de gran nivel y espacios axardinaos amplios. La mayor parte de la residencia obrera concéntrase nel fondu de valle, nel barriu de La Fábrica, estendiéndose llueu a El Pontón, a lo llargo de la carretera hacia Piedrasblancas. Nel primeru atopamos equipamientos como l’economatu y tipoloxíes de vivienda distintes: antiguos cuarteles, cases terrenes o curioses cases de corredor ente medianeres. N’El Pontón repítense les cases de corredor, pero apaecen tamién modelos más evolucionaos, como pabellones de pisos de calidá notable. 

Faustino Suárez Antuña