Fábrica de Conserves Albo

Cola muerte del so fundador Carlos Albo Kay, nel 1909, modifica la so razón social pasando a adquirir la denominación nueva de Vda. e Hijos de Carlos Albo. Coincidiendo con una etapa de bonanza y espansión de la industria conservera, la sociedá abre nos años siguientes instalaciones nueves en Llastres, Ribeseya y Veiga, n’Asturies, a les que se suma la factoría luguesa de Celeiro.

La fábrica de conserves de Candás, a plenu rendimientu dende la segunda década del sieglu, dirá modernizándose, ampliando les sos dotaciones y maquinaria. Al cuidáu del arquiteutu Manuel del Busto queda’l proyeutu d’ameyoramientu y ampliación de les instalaciones, del 1919, al que se sumen socesives obres de reforma y tresformaciones derivaes de los cambeos que se van dir introduciendo nel procesu productivu.

Los trabayos y inversiones más significatives acométense, en tou casu, nel contestu de l’autarquía, particularmente na década del 1950, cola instalación de la fábrica de vacíu, siguiendo les traces de Bienvenido Alegría, la construcción d’un garaxe nuevu y un comedor, xunto col afayamientu de les naves de fabricación d’envases de lata, a cargu del arquiteutu Mariano Marín. Naves nueves dedicaes a la fabricación, talleres mecánicos y almacenes pónense al serviciu d’una producción orientada al mercáu nacional y, col pasu los años, preferentemente dirixida a la esportación de bonitu y d’atún, ente otros países, pa Suiza.

Nel 2009 la fábrica centenaria d’Albo pesllaba de manera definitiva les puertes. Años enantes, el pintor Alfredo Menéndez entamaba dos murales nel esterior de la factoría, nel marcu del proyeutu de Muséu de Pintura al Aire Llibre de Candás, iconográficamente presidíos, como nun podía ser d’otra forma, polos llabores venceyaos cola pesca.

Natalia Tielve García