Tresportes
Les grúes sobre carriles son unos elementos mui llamadores, que pueden vese tanto en ferrocarriles d’usu públicu (onde s’utilizaben sobre manera nos trenes d’intervención p’accidentes) o en ferrocarriles industriales, nesti casu pa mover pieces, cargar vagones, etc.
Ente estos últimos atopamos un exemplar que perteneció a Duro Felguera y que, a falta de denominación oficial, conociose siempre col apellativu de ‘Leona’. De los sos oríxenes nun sabemos absolutamente nada, sacante que pudo construyise na década del 1920, anque’l primer testimoniu gráficu conocíu d’ella data del 1943.
Taba montada sobre un bastidor con dos exes y vía ancha, provista d’una plataforma xiratoria na que s’asitiaben la caldera vertical y los engranaxes que permitíen el so manexu, too ello protexío por una cabina metálica zarrada, que posiblemente recibió dalguna reforma a lo llargo de la so vida activa. La pluma yera fixa, de celosía, y dotada d’un ganchu móvil nel so estremu. Yera un vehículu autopropulsáu, con una tresmisión que lu facía movese y contaba amás con anclaxes pa fixala a la vía cuando s’utilizaba. El so pesu yera de 27 tonelaes.
Utilizóse pal trasiegu de pieces dientro de la factoría de La Felguera y tuvo una hermana más pequeña, anque d’estructura similar, conocida como ‘Pantera’. Entrambes taben en funcionamientu nel 1965 y la ‘Leona’ siguó n’usu hasta la década del 1970, yá en tiempos d’ENSIDESA. Llueu del esmantelamientu de la planta felguerina quedó varada nel parque empresarial Valnalón xunto coles últimes llocomotores de vapor preservaes ellí.
Finalmente cedióse al Museo de la Siderurxa, restaurada cosméticamente, incluyida la llamativa pintura mariella que llució na so etapa última, y anguaño ta nel interior de les vieyes naves de Metalsa de La Felguera, entovía ensin esponer al públicu.
GALERÍA D'IMAXES
Comentaris recents