Ilesia de Santa Bárbara

El so predominiu visual y simbólicu sobre les viviendes y el restu de los equipamientos de Llaranes yera toa una declaración d’intenciones sobre l’importante papel social que la relixón tuvo na vida diaria de los trabayadores de la Empresa Nacional Siderúrgica, S.A (Ensidesa), paeciendo «querer vixilar y amparar maternalmente a los sos feligreses».

El templu consagróse’l 30 d’avientu del 1957, al empar que la creación de la parroquia nueva esvanecía la importancia histórica del templu vieyu y del so patrón, San Llorienzo. La construcción nueva, de planta de cruz llatina y dimensiones grandes, diseñóla Juan Manuel Cárdenas y contó con una pequeña intervención de Francisco Goicoechea como autor del altar mayor. Los sos plantegamientos estilísticos, más cercanos a l’arquiteutura oficial de posguerra qu’a la modernidá qu’apreciamos n’otros inmuebles del pobláu, pretendíen «fuxir de cayer nuna arquiteutura desaxeradamente folclórica, nin pol contrariu absurdamente modernista», en pallabres del propiu autor.

A los pies llevántase una torre-campanariu de veinticinco metros d’altor, visible dende numberosos puntos del conceyu avilesín. L’usu del granitu, los frontones triangulares, les pirámides, los aletones y l’encaxáu de dalgunos elementos sustentantes son reminiscencies clásiques que s’estremen notablemente del tratamientu espacial, diáfanu y llixeru plantegáu nel interior del edificiu. Ellí tien especial relevancia la obra del artista madrilanu Javier Clavo, colos más de cuatrocientos metros cuadraos de pintures al frescu que cubren el tambor octogonal sobre’l cruceru y los cuatro pilares, asina como’l conxunto de vidreres y mosaicos que conviven, en plena harmonía, col retablu mayor. Esta obra renacentista del sieglu XVI procede de la población burgalesa de Tubilla del Lago y narra, nes sos pintures sobre tabla de calidá esceicional, la vida de Xesús.

Rubén Domínguez Rodríguez