Ilesia del Carmen

El templu allinióse en diagonal dientro del terrén habilitáu pa la so construcción, abriendo la so fachada principal a la interseición referida anteriormente. Ye de planta rectangular con dos capielles apegaes a dambos llaterales. Xunto a ella asítiase una socesión de pórticos con arqueríes parabóliques, en consonancia cola morfoloxía del propiu templu, que quier imitar la quilla d’un barcu. Esti componente d’herencia gaudiniana, aceutáu pol réxime franquista, complétase con dalgunos elementos que remiten a l’arquiteutura de l’autarquía, como’l campanariu arrodiáu por pirámides. Na parte posterior del templu construyóse la casa rectoral que, magar la so cenciellez, respuende tamién al diseñu del propiu Castelao.

Son dellos los materiales emplegaos, en función de la so visibilidá y del papel que desempeñen dientro de la estructura. La base, incluyida la cimentación, yera de formigón armao, mientres que los murios de zarru construyéronse con lladriyu. Nel interior el mobiliariu afáyase a la orixinal forma del edificiu: los confesionarios, los altares y los púlpitos tienen al empar el dinamismu de les formes curves de los murios del templu. Cuenta, amás, con una tribuna sobre l’accesu principal y con una mayor elevación de la capiella central y de les dos llaterales. 

La desacralización de la ilesia tres la procesión del 16 de xunetu del 2008 provocó una estroza progresiva. Ta protexida a nivel municipal y, tres dellos intentos ensin ésitu, ta prevista la so rehabilitación p’albergar nuevos usos.

Rubén Domínguez Rodríguez