Llocomotora DF 607

Formaba parte d’una serie de diez exemplares adquiríos pa facer maniobres n’estaciones importantes como Atocha, Alacant o Sevilla. En realidá yera un modelu inspiráu nes máquines industriales, con tanques llaterales, dos exes motores y cilindros esteriores.

Nel 1944 RENFE vendióla a Duro Felguera, onde conservó’l so númberu original, yá que nun llegó a llucir la matrícula 020-0237 que-y diere la empresa pública. Yá n’Asturies dedicóse a facer maniobres dientro del complexu siderúrxicu llangreanu, un llabor pal que, per otra parte, resultaba bastante amañosa.

Un detalle pon de manifiestu la so calidá: cuando pasara a manes d’UNINSA, la 607 reconstruyóse cola caldera d’una llocomotora de construcción alemana muncho más nueva yá desguazada. Ensin dulda la veterana belga yera preferible y decidióse renovala con componentes más modernos, creando asina un exemplar híbridu que ye’l que llegó hasta los nuesos díes.

Nos sos tiempos últimos, la 607 llegó inclusive a funcionar dalguna temporada en Mieres enantes de la so retirada definitiva a lo último de los años 70. Quedó entós arrumbada xunto con otres máquines na planta felguerina, tresformada depués del so esmantelamientu nel parque industrial de Valnalón. Finalmente, tres munchu tiempo d’abandonu, cedióse al Conceyu de Llangréu como parte de los fondos del Muséu de la Siderurxa y acometióse la so restauración estética. Desgraciadamente ta güei nel interior de les vieyes naves de Metalsa, fuera de la vista del públicu.

Amás d’esti exemplar, delles de les sos hermanes sobrevivieron en dellos llugares d’España y inclusive una d’elles, la 602, anguaño en Lleida, restauróse n’orde de marcha

Guillermo Bas Ordóñez