Tresportes
El Ferrocarril Vasco Asturiano desempeñó un papel fundamental na articulación de la rede de vía estrecha d’Asturies, asina como nel desendolcu de la minería del carbón na cuenca d’El Caudal y la configuración del puertu de San Esteban. Munchos elementos d’esta empresa tomáronse del Santander-Bilbao, llinia cola que compartía aicionistes y inxenieros. Ye’l casu del diseñu de les estaciones o del material móvil.
Nel de les llocomotores, los primeros modelos inspiráronse nos qu’utilizaba aquella compañía, toos de procedencia británica. Nel 1902 el Vasco Asturiano adquirió les sos primeres máquines, una familia de cuatro exemplares a la firma Hunslet Engine, similares a una serie yá en serviciu na llinia vasco-cántabra. Recibieron los númberos 20 a 23 y bautizáronse colos nomes de los principales ríos que travesaba’l ferrocarril. Teníen trés exes acoplaes, cilindros esteriores y tanques llaterales pal agua.
La segunda d’elles, la númberu 21, llevó’l de NALON y adquirió notoriedá yá nos díes primeros al ser utilizada la so semeya de fábrica pa ilustrar un catálogu del fabricante. A lo llargo de la so vida activa la NALON emplegóse nel serviciu a los diferentes ramales mineros del Vasco Asturiano (mui especialmente nel de Figareo a La Cuadriella) asina como en servicios de maniobres, trenes de trabayos o especiales.
Cuando, metanes los años sesenta, el Vasco Asturiano xubiló les sos llocomotores de vapor, vendió dalgunos exemplares d’esti modelu a empreses mineres. La 23 CUBIA terminó los sos díes en Fábrica de Mieres, mientres que la NALON pasó a les manes de la Sociedad Industrial Asturiana Santa Bárbara pa facer maniobres na planta de aglomeraos que tenía en Figareo.
Pocu tiempo más tarde cambiaría pa Hunosa y, cuando la factoría foi esmantelada hacia’l 1970, la compañía estatal unvióla a La Cuadriella pa realizar maniobres nel llavaderu de carbones. Sicasí, por causas que desconocemos, apartáronla de manera inmediata a la so llegada a Turón. Depués de más de venti años d’abandonu, cedióse al Muséu del Ferrocarril d’Asturies, qu’acometió la so restauración cosmética.
La NALON ye una amuesa soberbia del diseñu industrial británicu y tamién una de les escases representantes del ampliu parque motor de la rede de vía estrecha de la costa cantábrica, que debe la so propia sobrevivencia a la so venta a la industria minera.
GALERÍA D'IMAXES
Comentaris recents