Llocomotora Rioseco

Promoviólu Cándido Blanco al final de la Primer Guerra Mundial pa coneutar delles concesiones mineres cola estación del Ferrocarril de Langreo de La Pola Llaviana. Arrancando d’ella siguía la carretera hasta Rusecu y daba serviciu públicu de viaxeros y mercancíes amás del tráficu carboneru, con un llargor de 11,8 quilómetros. Completaben la rede dos ramales mineros dafechu que dende El Puente d’Arcu llegaben a Ribota y Tolivia y se punxeron en marcha nel 1921.

El negociu adquiriólu poco después la empresa catalana Cementos Fradera, que la emplegó p’abastecer la so planta cementera de Vallcarca. El tráficu del ferrocarril mermaría col pasu de los años hasta la so clausura nel 1968, cuando yera l’últimu tranvía de vapor que funcionaba n’España. La llinia (y, por estensión, les sos llocomotores) conocióse como La Campurra, nome que vien del llamatu del so propietariu orixinal.

Pa la so apertura, Blanco compró dos llocomotores-tranvía a la empresa alemana Linke Hofmann que llevaron los númberos 1 y 2. Carauterizábense por tener una carena que protexía tola so estructura col fin d’evitar posibles atropellos. Depúes de dalgunos años elimónose y entrambes máquines tomaron un aspeutu dalgo más convencional. Cuenta con dos exes motores, bastidor esterior y tanque d’agua baxo la cabina, una disposición peculiar derivada de la so fisonomía primitiva.

La segunda d’elles recibió’l nome de RIOSECO y foi la última máquina utilizada na llinia hasta’l so pieslle, cuando yera yá la única capaz de funcionar. Quedó abandonada na estación de La Pola Llaviana y posteriormente colocada como monumentu nuna gasolinera próxima hasta que la rescató’l Muséu de la Minería. Nel añu 2008 pasó per una restauración cosmética que-y dio l’aspeutu actual, yá que presentaba un avanzáu estáu d’estroza.

Ye la única llocomotora construyida por Linke Hofmann que se conserva n’España y un testimoniu valiosu de los tranvíes de vapor que circularon nel nuesu país.

Guillermo Bas Ordóñez