Llocomotora Santa Bárbara

La situación financiera del so propietariu complicóse y, nel 1911, la SANTA BARBARA embargóse xunto con otros bienes pertenecientes a la empresa. Paez ser que foi adquirida en puya pública por Fábrica de Mieres, que necesitaba reforzar el so parque motor, sobre manera na llinia de Baltesara, que contaba con un perfil bastante difícil.

La máquina yera especialmente apta pa esi trabayu: con trés exes motores y una amplia caldera desendolcaba una gran potencia pa un anchu de vía de 750 milímetros. Si a ello xunimos el so bastidor esterior y una peculiar cabina con perfil en S que s’adautaba a los túneles del ferrocarril guipuzcoanu, el resultáu ye un exemplar realmente únicu.

En Mieres conservó’l so nome orixinal, qu’honra a la patrona de los mineros, y recibió amás el númberu 12. El so resultáu foi esceicional, lo que la convirtió na máquina favorita de los ferroviarios que trabayaron con ella, y inclusive motivó a Fábrica de Mieres a encargar otru exemplar idénticu, bautizáu como MARIANA.

La nuesa protagonista, qu’hacia l’añu 1960 recibiría’l númberu 111, tuvo funcionando na llinia de Baltesara y, posteriormente, tamién na de Polio, remolcando trenes carboneros. Pasó nel 1967 a manes d’HUNOSA y retiróse del serviciu pocu tiempu depués cola llegada de les llocomotores diésel. Quedó apartada nes víes d’El Batán y yá dende un primer momentu delles voces reivindicaron la so conservación como una de les máquines más representatives de l’antigua Fábrica de Mieres.

Esa condición garantizó la so sobrevivencia como monumentu, xunto con un vagón de carbón, anque con un importante esgaste. Restaurada nos años noventa per parte d’HUNOSA, cedióse finalmente al Muséu de Xixón, onde s’espón anguaño. 

Guillermo Bas Ordóñez