Llocomotora SHE 5

Pa la so puesta en marcha compróse una serie de máquines a la empresa parisina L. Corpet, qu’entregó cinco exemplares ente’l 1884 y el 1891. Presentaben un diseñu mui poco habitual, que yera una especialidá del fabricante. Contaben con trés exes motores y bastidor esterior, pero lo más llamativo yera’l so mecanismu de distribución indireuta Brown, colos cilindros asitiaos percima de les ruedes. Según el constructor, esta disposición dexába-yos circular per zones enllenaes y con víes en mal estáu.

Sicasí, el modelu dio un resultáu mui bonu, yá que toes elles dieron serviciu per munchos años y inclusive se llegó a construyir un sestu exemplar nos talleres de Sovilla aprovechando pieces de repuestu.

Dieron toa clas de servicios: inicialmente, el remolque de trenes de carbón contra Uxo o Sovilla, xera de la que foron relevaes de mou gradual por llocomotores más modernes. Sicasí, siguíen siendo útiles pa los coches d’obreros, los convóis d’escombru o de suministros de tou tipu destinaos a los grupos mineros.

La postrera de la serie, la númberu 5, permaneció en funcionamientu hasta lo último de los años sesenta, cuando foi retirada cola puesta en serviciu de los tractores diésel. Permaneció per dalgún tiempu apartada en Sovilla y más tarde HUNOSA cedióla a la Escuela d’Inxenieros Téunicos de Mines de Mieres, onde tuvo arrumbada nes sos instalaciones bastantes años.

Finalmente volvió a ser cedida, nesta ocasión al Muséu del Ferrocarril d’Asturies, que procedió a la so completa restauración y puesta en marcha. Priéndese regularmente y circula peles víes del complexu xixonés remolcando a viaxeros peles sos instalaciones como una de las pieces más estraordinaries del patrimoniu ferroviariu asturianu.

Dos de les sos hermanes conserváronse fuera d’España: una en Portugal y otru exemplar, también en condiciones de funcionamientu, en Gran Bretaña.

Guillermo Bas Ordóñez