Llocomotora Solvay nº 2

Tresportes

Llocomotora Solvay nº 2

Muséu del Ferrocarril d'Asturies, Xixón

Pozo Solvay

372427659

Pozu Solvay

375428265

Muséu del Ferrocarril

522717762

Llocomotora Solvay nº 2

La empresa belga Solvay ye conocida sobre manera pola fabricación de productos químicos y el so establecimientu nel nuesu país entamóse cola apertura d’una planta na población cántabra de Barreda. Col fin de proveela de combustible compró tamién delles concesiones mineres nel conceyu de Siero, qu’esplotó dende la primer década del sieglu XX. La salida del mineral facíase per un ramal de vía métrica qu’enllazaba na estación de Rianes cola llinia d’Económicos de Asturias.

Pa dar serviciu nesi percorríu la empresa adquirió nel 1909 una llocomotora a la firma alemana Henschel que llevó’l númberu 2. Esa casa suministrara otra máquina a Barreda dalgún tiempu enantes, lo que xustifica la so matrícula. Ye un exemplar típicu de los diseños industriales alemanes d’esa época, con trés exes acoplaos y el tanque d’agua nel bastidor.

El so llabor yera remolcar los trenes con material vacío o suministros que se dirixíen al llavaderu de Minas de Lieres y, nel sentíu contrariu, baxar colos convóis de mineral. Nun yera una xera fácil por mor de la fuerte pendiente de la llinia, qu’esixía un gran arremangu al maquinista a la hora de manexar el frenu pa evitar accidentes.

Tuvo en serviciu hasta l’entamu de la década del 1980, lo que la convirtió nuna de les últimes llocomotores de vapor actives n’Asturies. Depués de dalgún tiempo apartada, depositóse nes cercaníes de FEVE n’Uviéu, llegando inclusive a valorase la so restauración, que finalmente nun se fadría. Pa cabu, cedióse al Muséu del Ferrocarril d’Asturies, onde ta anguaño.

Tien la peculiaridá de que, pol so bon estáu, nun se sometió a nengún tipu de restauración, sinón que ta igual que cuando se recibió. Sorpriende’l color de los sos tanques y cabina, marrón virao al púrpura. Naz d’un caprichu, pues reproduz el pelame del güe favoritu d’un vieyu direutor de la empresa, qu’ordenó que la máquina se pintara nel mesmu tonu que l’animal.

Ye l’únicu elementu sobreviviente de la rede ferroviaria de Lieres, lo que la convierte nuna pieza d’altu valor dientro del patrimoniu industrial asturianu.

Guillermo Bas Ordóñez

GALERÍA D'IMAXES