Llocomotora Varela de Montes

Ye la única sobreviviente d’una serie de 36 exemplares iguales destinaos a servicios tanto de viaxeros como de mercancíes en llinies con perfil difícil. El so diseñu fíxose pensando especialmente nes ramples de Payares y Brañuelas, con trés exes motores d’un diámetru moderáu. Teníen dalgunes carauterístiques avanzaes pa la época, como un timbre de caldera relativamente altu, cabina zarrada pa protexer al personal de conducción o frenu de vacíu simple pa los trenes de viaxeros, llueu sustituyíu por otru automáticu.

La Varela de Montes pasó la mayor parte de la so vida activa n’Asturies, destinada al depósitu de máquines d’Uviéu. Tuvo nun primer momentu encargada del tráficu de trenes, tanto de viaxeros como de mercancíes, hasta que, al final de la so vida activa, separtáronla pa los servicios de maniobres. Retirada del serviciu activu, nel 1967 vendióse a Hunosa, que la utilizó pa remolcar trenes ente’l cargaderu de Barreo y el llavaderu d’El Batán.

La so carrera terminó hacia’l 1973, cuando quedó definitivamente apartada n’El Batán, onde sufrió una estroza importante. Na década del 1990 restauróse estéticamente tres la so cesión al Muséu del Ferrocarril d’Asturies, onde ta espuesta anguaño col númberu 1.672 que llevó baxo l’alministración de la Compañía del Norte.

Ye una representante escelente de la teunoloxía ferroviaria del últimu cuartu del sieglu XIX y tamién d’una de les principales series de llocomotores que protagonizaron el tresporte de viaxeros na rede de vía ancha d’Asturies per décades, especialmente asociada a la Rampla de Payares. Too ello conviértela nuna de les pieces principales del patrimoniu ferroviariu del Principáu.

Guillermo Bas Ordóñez