El modelu escoyíu foi’l de les llocomotores Borsig de la serie 22 a 24, que se suministró a lo primero del sieglu XX pal Ferrocarril General. El momentu foi’l de la Posguerra, cuando l’aumentu de tráficu fixo necesario incorporar más exemplares y la industria privada nun taba en condiciones de facelo.
D’esa forma, ente los años 1945 y 1954, la Seición de Construcción de la empresa, asitiada en La Felguera, construyó ocho exemplares copiando les carauterístiques de les Borsig. Formaron la serie 31 a 38 y destináronse indistintamente al Ferrocarril General o a la rede interior de la planta siderúrxica de Duro.
Dos exemplares d’esi modelu llegaron hasta los nuesos díes. La primera ye la númberu 35, bautizada ADARO n’honor al célebre inxenieru qu’ocupara la direición de la compañía nos sos primeros tiempos. La segunda ye la númberu 38, que nun tuvo nome y se punxo en serviciu nel 1954, dos años depués que la so compañera. Tien la distinción de ser la postrer llocomotora de vapor d’anchu de vía de 650 milímetros construyida para la SMDF.
En tiempos d’HUNOSA, entrambes máquines adaptáronse nos talleres de Santana al anchor de 600 milímetros y unviáronse a Turón, onde circularon nel ferrocarril qu’aunía La Cuadriella con Fortuna hasta la so clausura nel 1972.
Posteriormente dambos exemplares regresaron al valle d’El Nalón, esta vez yá como monumentu. L’ADARO colocóse nos xardines del Pozu Sotón y la so hermana nel Pozu Entrego. Tres el pieslle d’esti últimu pasó a María Luisa y, finalmente, llevóse al Sotón, onde comparte escenariu cola so ximielga.
Entrambes constitúin un bon exemplu de l’adaptación d’un modelu estranxeru per parte de la industria asturiana y un testimoniu mui representativu de los ferrocarriles industriales de la cuenca d’El Nalón.
Guillermo Bas Ordóñez
Comentaris recents