Mines de Buḥerrera

La esistencia de manganesu nos Llagos d’Enol y La Ercina yá se conocía de manera oficial dende’l 1844, añu en que se denunció la primer concesión minera (“Nuestra Señora de Covadonga”). Sicasí, el so beneficiu sistemáticu nun principió hasta un tiempu depués.

Hacia’l 1870 foi una sociedá franco-belga la encargada d’entamar la esplotación minera en Buḥerrera, y a lo último d’esi sieglu pasaron a manes de capital anglosaxón y constituyóse l’Asturiana Limited, entidá de duración escasa yá que’al final del 1899 adquirió la propiedá a The Asturiana Mines, Ltd., con domiciliu social na población inglesa de Middlesbrough. La so actividá acabó nel 1932 por mor d’una importante crisis de precios y de consumu.

A partir d’esi momentu fíxose cargu de les concesiones la Compañía de Minas de Covadonga, S. A. (Comicosa), intensificando de manera notable la producción nos años que siguieron a la Guerra Civil. Esta empresa abandonó nel 1958 la so presencia nel ámbitu de Buḥerrera, pero caltuvo la propiedá de los depósitos residuales esistentes na Vega Comeya y d’otres zones más cercanes a Cuadonga.

Como carauterística fundamental, les menes presenten como componentes esenciales hematites y pirolusita, acompañaos por goethita (a los que s’asocia Hg) y otros minerales ferro-manganesíferos. L’añu 1910 foi’l más productible con unes 60.000 tonelaes y caltúvose ente 20.000 y 30.000 tonelaes bona parte de les anualidaes restantes del primer cuartu del sieglu pasáu.

Les mines de Buḥerrera asítiense nuna antigua zona glaciar, fechu qu’esplica’l que tean arrodiaes por depósitos morrénicos. Sorpriende l’aspeutu peculiar que presenten anguaño les buelgues del vieyu llabor, amosando una llamativa morfoloxía constituyida por columnes de piedra caliar, restos d’un karst a pináculos que quedó al descubiertu poles actividaes estractives de les acumulaciones de manganesu y fierro metíes pente  depósitos arcillosos que rellenaben los güecos caliares.

Carlos Luque Cabal y Manuel Gutiérrez Claverol