Monumentu a Luis Adaro

Depués de la muerte del industrial, nel 1915, a pidimientu de la sociedá La Montera, vese la comeniencia de perpetuar la so memoria con un monumentu conmemorativu. Encomiéndase’l trabayu al escultor sevillanu Lorenzo Coullaut Varela que, formáu nel taller d’Agustín Querol, contaba con un reconocíu prestixu –gallardonáu nes Exposiciones Nacionales de Bellas Artes y Premio Nacional de Escultura nel 1906– y una sólida esperiencia na obra monumental pública, siendo responsable, ente otros, de los monumentos a José María de Pereda en Santander y a Campoamor en Madrid. Costiada per aciu de suscripción pública, la obra en reconocimientu a Luis Adaro inauguróse’l 25 de xunetu del 1918, coincidiendo coles fiestes de Santiago.

El monumentu parte d’un cuidáu diseñu arquiteutónicu, llevantándose sobre una base de planta cuadrada y escalonada sobre la que s’asienta la popular figura de La Carbonera. Recreando la entibación d’una mina, nel so frente atopa acomodu una vagoneta que vuelca’l carbón. L’escudu de la minería, hedres y lloreos, como principales elementos decorativos, completen una elocuente composición que culmina col bustu del efixáu, Luis Adaro y Magro, presidiendo’l conxuntu. Una escoyeta iconográfica caltriada de retórica, que, lloñe de ser casual, s’acomoda al homenaxáu, a los sos intereses y ocupaciones, emponderando la so consagración a les artes de la minería y de la industria. Pero tamién s’afaya la representación al contestu, al marcu nel que s’asitia, el Parque Dorado de Sama, un espaciu de marcáu estilu industrial y mineru. De factura impecable y correición téunica indiscutible, la monumental pieza conxuga cenciellez y rotundidá volumétrica, naturalismu y simbolismu.

La cartela que figura na trasera incorpora la dedicatoria: “A don Luis Adaro 1849-1915. Home xustificáu, inxenieru eminente, xeólogu ilustre, impulsó cola so direición el desarrollu industrial d’Asturies (A don Luis Adaro 1849-1915. Varón justificado, ingeniero eminente, geólogo esclarecido, impulsó con su dirección el desarrollo industrial de Asturias)”.

Natalia Tielve García