Muséu de la Minería

El MUMI inauguróse en marzu del 1994 y compónse d’un edificiu principal, obra del arquiteutu Juan Ramón Fernández-Tresguerres, y una mina imaxen, de diseñu del inxenieru de mines José María Iglesias Fernández. Asítiase sobre una antigua escombrera, un depósitu d’estériles de mina qu’afeutaba a una amplia zona de ribera d’El Nalón fondamente estropiada por decenios de llaváu y depósitos de carbón, ríu que naquellos años taba siendo recuperáu con cargu al Plan Nacional de Interés Comunitario, del que recibió tamién financiamientu’l muséu. Asina, la instalación, en conxunción cola rexeneración del Nalón, permitió recuperar un ampliu marxe ribereñu que s’incorporó a la función urbana, ameyorando’l so mediu ambiente y conexón territorial.

Bien llueu’l muséu tuvo un gran númberu de visitantes, un públicu que sigue calteniendo anguaño con más de sesenta mil entraes añales que lu convierten nel quintu centru más visitáu d’Asturies. Pero amás, y lo que ye más importante, el MUMI sigue siendo la meyor opción pa entender el llabor estractivu de la hulla, los sos mecanismos, teunoloxía y historia, asina como de la rellación con ramos de la industria diferentes, sobre manera de la química del esplosivu. 

Ye un muséu de dimensiones monumentales que cuenta con una completísima y esceicional coleición de pieces d’altísimu valor y interés, tanto no que se refier a llámpares mineres, minerales, maquinaria, llocomotores, maquetes o cartelería. Una esposición única que se completa con un percorríu pela mina imaxe onde atopamos entá más pieces orixinales o ramples mineres que permiten, gracies a una guía escelente, entender el trabayu mineru y la so evolución. 

Faustino Suárez Antuña