Solvay promovió dos unidaes de residencia en Lieres que son l’exemplu asturianu meyor de la evolución de les polítiques sociales d’empresa: El Campiellu y La Pedrera. El primeru construyóse a partir del 1909 con un planu llinial al que s’abren les viviendes pa delles categoríes profesionales, toes siguiendo modelos constructivos marcadamente centroeuropeos onde predomina’l lladriyu y s’añaden contraventanes, guardamayes…
Nel 1953 l’espaciu de residencia amplíase col pobláu de La Pedrera, cercanu al anterior y destináu a emplegaos. Equí, sobre un plano ortogonal, organízase un pobláu de pequeñes viviendes apareyaes de planta y pisu inscrites en parceles amplies. Rescampla’l casinu-cine, como’l restu del conxuntu obra de los arquiteutos Somolinos, que preside l’amplia plaza central de xuegos y xardín. Güei desnaturalizao por una intervención penosa, el casinu yera un exemplu escelente de la obra d’estos arquiteutos, conxugando’l rexonalismu de posguerra col racionalismu y la utilización d’elementos de la arquiteutura vernácula, como la panera de la entrada, de dalguna forma presente tamién nes viviendes.
Frente a otros modelos mineros, onde la vivienda obrera se concentraba nos espacios marxinales, sobrantes y menos afayadizos (humedá, al aveséu o contaminación), y onde tan filantrópica concesión yera contrarrestada pola vixilancia ríxida y control, en Solvay esto nun foi nin la llinia nin el motor fundacional. De fechu, les viviendes de Solvay en Lieres tán en suaves esmontes fechos na lladera de solana, como El Campiellu, o n’amplios llanos, en La Pedrera, toes bien ventilaes y nunca aisllaes del esterior. En definitiva, podemos afirmar que’l modelu de Solvay, ensin ser perfeutu, foi la meyor posibilidá de la que dispunxeron los trabayadores de la mina no qu’a vivienda d’empresa n’Asturies se refier.
Faustino Suárez Antuña
Comentaris recents