Industries
919606629
ENDASA
1051165119
Pobláu d'ENDASA
Avanzada la década del 1950, la Empresa Nacional del Aluminio (ENDASA) instálase na oriella derecha de La Ría d’Avilés. Los sos trabayadores, al igual qu’asocede con otres empreses estatales impulsaes pol Instituto Nacional de Industria, en particular la vecina ENSIDESA, teníen accesu a una serie de servicios y d’equipamientos sociales qu’incluyíen prestaciones asistenciales, sanitaries, farmacéutiques, ayudes pa la formación, abastecimientu de productos básicos, etc. Ente estes dotaciones taba l’agospiu pal personal emplegao y les sos families; con esti propósitu ENDASA promueve un pobláu d’empresa.
Tamién conocíu como pobláu de San Balandrán y, popularmente, como El Pobladín, el pobláu d’ENDASA asítiase na parroquia de Llaviana, perteneciente al conceyu de Gozón. Ocupa una finca que ronda los 90.000 metros cuadraos de superficie, allugada nes cercaníes del recintu industrial. La so construcción entama nel añu 1958, siguiendo’l proyeutu de Juan Manuel Cárdenas Rodríguez, ún de los arquiteutos de la modernidá que con mayor dedicación trabayó pa ENSIDESA, faciéndose cargu xunto con Francisco Goicoechea Agustí, ente otros diseños, del de la mallograda central térmica y del trazáu urbanísticu del pobláu de Llaranes.
El pobláu d’ENDASA axunta un total de sesenta viviendes, agrupaes en bloques de pisos alliniaos p’adaptase al desnivel del terrén. De planta rectangular, organizaos n’alzáu en trés altures, los bloques de viviendes respuenden a un regular tratamientu de fachaes: cimentación de formigón armao, paños de lladriyu visto sobre zócalu d’aplacáu de piedra, balcones n’altura y voladizu con antepechu frontal de formigón. La introducción d’entrantes y salientes anima de manera discreta la composición. Los agospios, ocupaos en réxime d’alquiler, cuenten con una superficie d’ochenta y cinco metros cuadraos y distribúinse n’estragal, cocina, sala de tar, cuatro cuartos y baños.
Anguaño una parte importante de les viviendes tán deshabitaes y l’estáu de conservación del conxuntu ye claramente mui deficiente.
Natalia Tielve García
GALERÍA D'IMAXES
Comentaris recents