Ponte de Los Ingleses

El ramal inauguráu nel 1896 tendría’l so entamu en Sama y terminaría n’El Cadavíu, onde contaría con cargaderos y una estación. Pa resalvar el ríu Nalón la empresa diseñó una ponte fantástica que, como’l restu d’obres del ramal, lleva la firma del inxenieru Miguel Ramírez Lasala, direutor de la compañía ferroviaria. La ponte foi construyida por Fábrica de Mieres, empresa que baxo la direición del afamáu inxenieru Jerónimo Ibrán contaba dende la década del 1870 col primer taller español especializáu en construcciones metáliques y, sobre manera, en pontes y vigues. 

La ponte, conocida popularmente como de los ingleses pola supuesta, anque non documentada, participación de téunicos d’esta nacionalidá na so construcción, asítiase sobre’l Nalón na trasera del Sanatorio Adaro. Ye una ponte d’un solu tramu de 60 m de lluz (64 m ente les exes de los apoyos) apoyáu sobre estribos de fábrica de piedra fecho con sillería de gran tamañu n’aristes, zócalos y pretiles, mientres qu’utiliza’l sillar nos frentes y nel restu mampostería ordinario con morteru hidráulico. La parte metálica pertenez a la tipoloxía de pontes de vigues reutes de celosía, encuadrándose nel subtipu de tableru inferior. Les vigues principales formen mayes triangulares del tipu Pratt reforciaes nel centru con otres dobles en naspa, algamando ocho metros d’altor y otros cinco entre les exes. 

La ponte taría en serviciu 112 años, hasta’l pieslle del llavaderu de carbones de Modesta, al que daba serviciu dende la clausura de les mines del Samuño. Anguaño tien el pasu zarráu y presenta un estáu de conservación precariu que clama por una intervención pa preservar una de les estructures industriales más señalaes de la nuesa industrialización. El restu del ramal ye reconocible hasta El Cadavíu, onde HUNOSA tiró embaxo l’antigua estación nel 2010. 

Faustino Suárez Antuña