Ponte de Rimoria

El Carrio y Rimoria allúgense nel marxe izquierdu d’El Río Nalón y el Barredos nel derechu, xunto con un espaciu central onde se asitiaben instalaciones como talleres, la plaza de la madera o’l cargaderu sobre’l Ferrocarril de Langreo. Con esta configuración El Río Nalón convirtióse nun importante obstáculu qu’había que salvar pa poder facer llegar hasta’l ferrocarril la producción del Pozu Carrio y los grupos de monte.

Hasta la construcción de la ponte de Rimoria les vagonetes cruciaben sobre l’agua per aciu d’un sistema de cable aereu que sufría paraes frecuentes por averíes que munches vegaes ocasionaben que’l contenedor y la carga acabasen nel fondu del ríu. Pa poner fin a esta situación decídese la construcción d’una ponte que permita’l pasu de llocomotores llétriques pal arrastre de los vagones.

Duro Felguera proyeutó una ponte d’aceru recurriendo a la solución de ponte mesta pal so diseñu, esto ye, de tableru superior con trés tramos sobre pilares metálicos y, al empar, colgáu. Esta solución permite salvar la distancia ente les orielles ensin apoyos intermedios nel so gran tramu central que cuenta con una lluz de 50 m. La estructura ta formada por dos vigues principales auníes por otres tresversales. Les principales d’alma allixerada tienen una altura de 2 m y encóntense sobre pilares metálicos que sirven tamién de sofitu a los castilletes de los cables d’aceru. Les tresversales, con una separación ente elles de 2,5 m, tán colgaes cada 5 m de los cables flotantes. L’anchor del tableru ye de 5 m y nel proyeutu orixinal contemplábense sobre él trés víes de 650 mm, de les que güei namái ta operativa la central. 

El conxuntu de pontes del Grupu Laviana complétase con otro tramu metálicu sobre’l cargaderu y el Ferrocarril de Langreo, y un pasu sobre la carretera d’Uviéu a El Campu. 

La ponte de Rimoria, una obra d’inxeniería estraordinaria, sigue n’usu amosando la so  imaxe elegante sobre El Río Nalón.

Mónica García Cuetos