Minería
De l’actividá minera de la pequeña población llavianesa de Carrio tenemos noticies al traviés de dellos autores, ente otros, Armando Palacio Valdés. Na so novela ‘La aldea perdida’ (1903) introduz dos personaxes, un inxenieru de Madrid y un químicu belga, llegaos a Llaviana pa dirixir los trabayos nuna mina acabante abrir en Carrio.
La esplotación de los xacimientos de la zona entamara a mediaos del sieglu XIX y, a lo último d’esa centuria, recibió l’impulsu decisivu cola prollongación hasta la capital del conceyu de dos víes de comunicación: la carretera ‘Carbonera’ (1872) y el Ferrocarril de Langreo (1884).
A lo primero del sieglu XX empresarios como Joaquín Velasco o los hermanos Felgueroso esplotaben un bon númberu de concesiones mineres, ente elles les allugaes en Carrio. Nel 1920, dientro del so procesu d’espansión pel valle, la Sociedad Metalúrgica Duro Felguera adquier parte d’eses concesiones pa poner en marcha lo que na siguiente década se conocerá yá como Grupo Laviana y qu’acabará incluyendo los pozos verticales de Carrio y Los Barreros y les esplotaciones de monte de Rimoria, na llende col conceyu de Samartín del Rei Aurelio.
Los trabayos d’afondamientu del Pozu Carrio principiarán na década del 1940. Nel 1949 móntase’l castillete de perfiles de fierro roblonao y terminen les obres del edificiu principal qu’acoyerá, ente otros servicios, les sales de máquines y calderes, la casa de baños, la llampistería, el botiquín, les oficines y los almacenes. Llueu de la so incorporación n’HUNOSA les aiciones de modernización entamaes incluyirán la sustitución d’esi castillete orixinal y la puesta en funcionamientu d’una nueva máquina d’estraición Koepe que requerirá la construcción d’edificiu nuevu p’abellugala.
L’actividá estractiva cesó n’avientu del 2018, algamando una fondura de 628 metros. Col so pieslle l’actividá minera del conceyu de Llaviana llegara al so fin.
GALERÍA D'IMAXES
Comentaris recents