Minería
El final de la Guerra Civil y el so resultáu favoratible pal gran capital minero metalúrxico asturiano animaron a retomar con rapidez los proyeutos d’afondamientu que quedaren pendientes pol golpe d’Estáu. Nel casu de la Duro, la década del 1940 será abondosa en reformes y ameyoramientos de les so unidaes carboneres, afalao too ello pol contestu autárquicu de la dictadura militar.
No que respeuta al Pozu San Mamés (1940-1992), que venía a esplotar per debaxo del nivel de los valles un macizu que, trabayao dende vieyu, heredara la Duro cola integración d’Herrero Hermanos nel 1902 y que la empresa llangreana beneficiaba dende entós per aciu mines de monte a distintes cotes del cordal. El Pozu San Mamés, tamién conocíu como Pozu Villar pol topónimu onde s’asitia, construyóse con notable rapidez, lo qu’esixó sistemes constructivos diferentes, especialmente visibles nel conxuntu del embarque. No que se refier a la maquinaria, rescamplaba la máquina d’estraición, sustituyida nel 1960 por un singular exemplu de tambor troncocónicu, mientres que l’anterior finó los sos díes, tres servir n’otros pozos de la empresa, nes obres del tresvase Tajo-Segura, final llaboral épicu pa delles máquines d’estraición de la hulla asturiana. El castillete, sicasí, ye tradicional enforma, siendo ún de los exemplos postreros que la Duro fadría per aciu de celosía de perfiles de fierro roblonao que se recorta sobre’l cielu de la villa capitalina sotrondina conformando un auténticu símbolu del nuesu pasáu más inmediatu.
El carbón unviábase al traviés del cargaderu de La Hullera, hasta onde’l Ferrocarril de Langreo punxera un ramal nel que s’inscribía’l Puente de Los Gallegos. La conexón ente’l pozu y el cargaderu obligó a la realización d’un túnel, que construyiríen presos políticos que redimíen les sos desviaciones políticas nuna colonia de la Obra de Redención de Penas con trabayu, cola que la Duro collaboraría de manera intensa, calteniendo trés centros: Villar, Mosquitera y Fondón.
GALERÍA D'IMAXES
Comentaris recents