Taller d’Axuste de la SMDF

Termináu nel 1896, el Taller d’Axuste consta de trés naves que, ocupando una superficie de 1.250 metros cuadraos, incorporen cubierta en dientes de sierra. Con zarramientu de lladriyu visto, en consonancia cola llinia estética predominante nos edificios de la Duro, nel interior colóquense columnes de fundición que tienen cerches metáliques. 

Les naves taben destinaes a acoyer la maquinaria necesaria p’acometer los trabayos de reparación que la factoría requería: cuatro tornos pa cilindros llaminadores y venti máquines-ferramientes, impulsaes por un motor de 50 caballos de potencia, d’espansión automática. Cada nave contaba con una grúa corredera de fierro que facilitaba les maniobres y seis pescantes con aparatos elevadores.

Magar las socesives intervenciones qu’esperimentó, l’inmueble nun vio modificada la so apariencia de forma drástica. Preserváronse les columnes de fundición y las cerches metáliques nel interior, asina como’l zarramientu de lladriyu visto y la cubierta tipu shed en bona parte de la estructura; namái ún de los tramos incorpora cubierta a doble vertiente. 

Sicasí, como consecuencia de l’amestadura de módulos nuevos, adquirió mayor complexidá na so configuración volumétrica. Asina, atopamos diferentes tramos de fachada y desigual distribución n’altura. Nos dos llaterales destaquen les llinies horizontales, mientres que’l central gana n’elevación y movimientu de planos. Los vanos, de configuración diversa, asítiense ente pilares remataos en forma d’almenes, unificando visualmente l’edificiu n’altura. Conserva nel interior dalgunes pieces de maquinaria d’interés grande.

Natalia Tielve García