Viviendes de la Estación

Ye una construcción rectangular, con cuatro altures na fachada a la vía y tres na opuesta, que s’abre a la cai. El baxu destinóse a almacén, con accesu namái pelos terrenos de la estación. Na primer planta asitiáronse un hospital (llau derechu vistu dende la cai) y l’economatu (a la derecha), entrambos separtaos pol portal y la caxa de les escaleres. El primeru contaba con sales d’espera y reconocimientu, un botiquín equipáu con rayos X y un departamentu de traumatoloxía. Polo que respeuta al economatu, tenía un despachu con mostrador, oficina y almacén.

Los dos pisos superiores destinábense a función residencial, con dos viviendes pa ferroviarios por planta pa trabayadores del Ferrocarril de Langreo. Caúna, con idéntica distribución, contaba con cocina, comedor, bañu y trés cuartos.

La estructura del edificiu yera de formigón armao, con cubierta a cuatro agües. L’esterior apaez decoráu con pilastres de piedra falso y orde xigante qu’articulen la fachada. La zona baxa ye d’esi mesmu material, mientres que nos pisos superiores combínense los paños de muriu enllucíu con otros recubiertos de plaqueta. El cuerpu central remátase con una peineta sobre l’aleru arrodiada por pináculos piramidales, elementos d’inspiración clásica qu’obedecen al gustu de l’arquiteutura oficial de la época.

Güei l’edificiu ta fuera d’usu, anque se caltién nun estáu aceptable. Constitúi un exemplu mui interesante de cómo les empreses combinaron distintes funciones dientro de la so aición social (atención sanitaria, economatu y residencia pa los emplegaos) dientro d’un únicu inmueble, con un resultáu estéticu propiu del so momentu, al empar que se consiguía una imaxe d’empresa repitiendo’l modelu n’otros llugares, como ye’l casu d’El Berrón.

Guillermo Bas Ordóñez