Industries
Nel 1923 créase la Cooperativa Eléctrica de Langreo que tenía como finalidá la producción d’enerxía llétrico utilizando como combustible carbón de baxa calidá. El promotor principal foi la Sociedad Metalúrgica Duro Felguera, qu’aportó les sos centrales d’El Sotón, en Samartín del Rei Aurelio, y La Felguera, más tarde treslladada al distritu llangreanu de Lada, onde se pondrá en marcha una planta nueva.
Participaron tamién otres siete compañíes productores de carbón que recibíen un derechu de consumu llétricu proporcional a les sos aportaciones de capital. Nel 1939 la empresa pasará a llamase Compañía Eléctrica de Langreo, siendo absorbida años más tarde por Hidroeléctrica del Cantábrico y, finalmente, por Iberdrola.
P’agospiar al personal direutivu de la empresa, la CEL promueve unes viviendes na actual cai Pablo Picasso de La Felguera. Nesa vía, xunto coles cais Conde Sizzo, nel mesmo distritu, y en La Unión, en Sama, asítiense los exemplos más representativos del conceyu de Llangréu del tipu de vivienda patrocináu poles empreses pal so personal direutivu. Ye, polo xeneral, d’espacios relativamente alloñaos de los centros de producción pa torgar los inconvenientes derivaos de l’actividá, como la contaminación o’l ruíu, escoyendo espacios non degradaos, parceles amplies y entornos cuidaos onde se construyen viviendes unifamiliares o apegaes.
Les viviendes ximielgues de la CEL proyeutáronse nel 1951 y estilísticamente siguen les pautes del estilu rexonalista mui estendíu na España de los años cuarenta y cincuenta, con chisgos a l’arquiteutura montañesa y vasca.
Nuna llocalización próxima, la Sociedad Ibérica del Nitrógeno promovió pocos años depués la construcción d’un grupu de viviendes siguiendo la pauta marcada pola CEL.
GALERÍA D'IMAXES
Comentaris recents